Xearte nace en xullo de 2014 no barrio compostelán de San Pedro, porta de entrada do Camiño de Santiago na cidade. Cada mañá, os aromas deste barrio de extramuros, ao que antigamente chamaban os Estados Unidos, cóanse pola reixa da xeadería que, tan pronto como se abre, contempla un incesante discorrer de pelegríns e veciños que veñen e van. Como non ser unha xeadería cosmopolita?

Así, na nosa carta contamos con sabores autóctonos e do mundo. Quince imprescindibles, quince especiais e quince estacionais compoñen unha oferta na que non faltan sabores de sempre como a nata, o amorodo ou a vainilla; sabores de hoxe como a stracciatella, o doce de leite ou a galleta oreo; sabores autóctonos como a torta de Santiago, o licor café ou o peregrino; e sabores estacionais como o turrón, a castaña ou o requeixo con noces. Todo un deleite para os sentidos que é froito do traballo, a experimentación e o desenvolvemento do noso pequeno obradoiro de San Pedro.